Mazali qayiqcha - bu qanday taom bo'ldi ekan deb qiziqyapsizmi? U holda kundalik menyuga yangilik kiriting va ushbu taomni albatta tayyorlang. Kartoshkadan tayyorlanadigan ushbu taomning tayyorlanishi oddiy, mazasi esa sizga ajoyib lazzatlanish baxtini taqdim etadi. Kechki ovqat dasturxonida ushbu taom hech kimning nazaridan chetda qolmasligi aniq.
Kerakli masalliqlar:
4 dona kartoshka
4 dona sarimsoq donachasi
100 gramm saryog'
2 osh qoshiq smetana
4 bo'lak dudlangan kolbasa
200 gramm qattiq pishloq
1 bog'dan ukrop va ko'k piyoz
Ta'bga ko'ra tuz va ziravorlar
Tayyorlash usuli:
1. Gaz pechini 200 darajada qizdiring. Kartoshkalarni yuving va quriting. Kartoshkalarni zaytun yog'i bilan surting va tuz seping. So'ng, pishirish qolipiga terib qizdirilgan gaz pechiga 1 soatga qo'ying.
2. Kartoshkalar tayyor bo'lishiga 30 daqiqa qolganda folga qog'oziga sarimsoq donachalarini tozalab qo'ying, tuz va murch qo'shing. 1 osh qoshiq saryog' va zaytun yog'ini sarimsoq bilan birlashtiring. Folga qog'ozini yaxshi o'rab kartoshkalar yoniga qo'ying.
3. kartoshkalar tayyor bo'lgunga qadar dudlangan kolbasa bo'laklarini maydalab to'rg'ang. Quruq, qizdirilgan tovada 2 daqiqa qovuring.
4. Pishgan kartoshkalarni gaz pechidan oling va sovuting. Sovugandan so'ng, o'tkir pichoq yordamida o'rtasidan 2 qismga bo'ling. Ichki qismini g'ovak qilib oling.
5. Kartoshkaning ichki qismini aloxida idishga folga qog'ozidagi sarimsoq bilan birlashtiring. Smetana, ozgina zaytun yog'i, mayda to'rg'algan ko'kat, kolbasa, qirg'ichdan o'tkazilgan pishloqni (pishloqning bir qismini ustiga sepish uchun qoldiring) birlashtirib, yaxshilab aralashtiring.
6. Kartoshkalar ichini zich qilib, tayyorlangan asos bilan to'ldiring.
7. Kartoshka ustidan katta bo'lmagan saryog' bo'lagini qo'ying va pishloqning qolgan qismini har bir kartoshka ustiga sepib chiqing.
8. Tayyor kartoshkalarni taxminan 10 daqiqaga gaz pechiga joylashtiring. Usti och tilla tusga kirgunga qadar. Mazali kartoshkalar tayyor!
Yoqimli ishtaxa!
