Округкэн гынунэтыӈ в’ойвэтын Палана нэеннэв’ ӄылэтылг’у ымыӈ ею, тит пылиткук елькучыкукинэв’ вэтгиӈо окружной калэяк искусствакэн. Ымоӈ инэӈэю еннин майӈыг’ытва «Камчадал».
«Эчги в’утин ванык нэетэйкыӈнэв’ елкукинэв’ вэтгиӈо. Ымыӈ виткукинэк пыкпыкык ӄымэк наныплэпав’нав’ ымыӈ ею, то опта эекэльг’эткинэв’ явэнаӈо нэтэйкынэв’»,- эвыӈ инэллэчг’ын таяӈгиӈэпыӈ то яялг’атгиӈэпыӈ крайик А. Дегодьев.
В’уччин калэян искусствакэн нымэлӄин ныг’итики, тит ӈэвэӄ нучельӄыкинэв’ камакъято еллайкэ, ачиматка ныг’итын, то ымоӈ ӈанкакенав’ вано метг’аӈ нанг’ыныплэпав’нав’. Викукинэк яяпыкпыкык калэяк искусствакэн нынылг’этылг’ын Кобалевский ятвалайкэ нымэйиӈӄин ваны паӈав’ъйийкин, ваны, миӈки наянмитытвайкынав’ мылавык, яӈъя ваны , миӈки кымиӈу яметытваллайкэ рисоватык, ымыӈ ятвалайкэ кабинето эналлачг’ыӈ, вэтатылг’эн, ичг’ийтывэнваны то ӄуччев’
Ӈэвэӄ нымэлг’эв’ еллайкэ вэтгиӈо, то аму 2021 гэвэгиӈык нэеплиткуӈын йиплэпавык калэян искусствакэн итылг’ын Паланык.
Тит ныг’итикынэв’ омакаӈ валг’о пылв’ынто тэйкык нымэйиӈӄинэв’ ремонтакенав’ вэтгиӈо музыкальный калэяк, то калэяк искусствакэн, тайкыёлӄыло йилнин Президентата РФ гемгетгивик в’аняванма Федеральный омакатыӈ 15 лыгуллэв’ыт йиг’илгык 2020 гэвэгиӈык. Йинтуйтывэвык Корякский калэян искусствакэн федеральный бюджетыӈӄо эллай мыкыӈ 78,5 миллионав’ пылв’ынто.
***
Камчаткан китыӈ ӈыеӄэв’кину Россияк йиплэпавгиӈэпыӈ йиг’это.
Акметгиӈо региональный тайкыёлӄылэн «Йиг’эткэнав’ этгиӈо» национальный тайкыёлӄылэпыӈ «Ав’ийитг’ымкылг’инав’ то нымэлӄинэв’ йиг’это “ нэгитэнэв’ Транспортный неделяк майӈыв’уйвык Москва.
Эчгыпо йинчоччымав’нэн С. Тынанто.